Neste VIII GALEUSCA HISTORIA queremos reflexionar arredor dalgúns fitos históricos cuxo aniversario se celebra o vindeiro ano 2026 e que afectan especialmente aos países da rede GALEUSCA.

En primeiro lugar, cumpriranse 150 anos da fin da última Guerra Carlista (1872-1876), que nos servirá para abordar as consecuencias dos cambios políticos acontecidos entre o Sexenio Democrático e o inicio do réxime restauracionista.

Por outra banda, celebrarase o 90 aniversario da aprobación do Estatuto Vasco de 1936 (1 de outubro) e do plebiscito do Estatuto de Autonomía de Galiza (28 de xuño), ofrecéndose a oportunidade de contrastar e valorizar o contexto do momento, e mesmo poñelo en relación co desenvolvemento da Autonomía catalá, vixente daquelas, desde o ano 1932.

Da mesma forma, cumpriranse 90 anos da sublevación militar fascista española e do comezo da Guerra, o que nos dará pé
a estudar os feitos bélicos acontecidos nos territorios de GALEUSCA, o seu desenvolvemento político e as distintas formas de represión física, política, económica ou profesional que exerceu o réxime franquista, así como o estudo do exilio forzado das e dos demócratas dos pobos catalán, galego e vasco.

Mais tamén aproveitaremos este VIII GALEUSCA para homenaxear a un dos impulsores desta rede, o profesor Joseba
Agirreazkuenaga, pola súa longa traxectoria. Tendo en conta que unha das principais achegas de Joseba Agirreazkuenaga é
a revitalización da historia institucional, abordaremos a análise sobre a xestación e evolución de institucións galeuscadianas de todo tipo: políticas, sociais, culturais, etc.